Gholfnuus 22 Maart

Vrydag 16 Maart se sundowner byeenkoms is gekenmerk deur relatiewe ongewoon lae tellings met Gerhard Hough wat met 21 punte die kompetisie gewen het. Hy is gevolg deur Andre Olivier met 18 punte, gevolg deur Basie Nortje, Louis Vermaak en Andre la Cock met 17 punte elk.

Saterdag 17 Maart het die groot jaarlikse gholfdag van die NG Kerk Riversdal Wes plaasgevind en is, soos gewoonlik, baie goed deur 64 gholfspelers van Riversdal en die omgewing bygewoon. Die kompetisie was ‘n vierbal spankompetisie en is gewen deur die span van Walter Diedericks, Davey Roberts, Denzil Geldenhuys en Andrew Meyer met ‘n uitstekende telling van 116 punte. Hulle is gevolg deur Bez Bezuidenhout, Wessel de Bruyn, Tos Michaels en Llwellen October met 111 punte, en Nathan Julies, JD Julies, Gawie von Molendorff en Corne von Molendorff met 103 punte. Die dag was ‘n groot sukses en al die fondse wat ingesamel is, sal ten bate van kinders aangewend word. Groot dank is verskuldig aan ds Deon Beyers en sy span vir die puik organisering en aanbieding van so ‘n groot dag met baie goeie pryse wat deur almal wat daaraan deelgeneem het, baie geniet is. Dit is voorwaar een van die gesogste borgdae op die gholfklub se kalender en spelers sien jaarliks daarna uit om by die dag betrokke te wees.   

 Klublede word herinner aan die Algemene Jaarvergadering wat Donderdag 22 Maart plaasvind waartydens die nuwe komitee verkies sal word. Lede word aangemoedig om die vergadering by te woon om sodoende insae in die finansies te kry en saam te praat oor belangrike besluite wat tydens die vergadering geneem sal word.

Gholfnuus 22 Februarie

Die sundowner byeenkoms Vrydag 16 Februarie is gewen deur JA Vermaak met 21 punte, gevolg deur Damien Juta, Grove Koch, Andre La Cock en Gerhard Hough met 19 punte elk.  

Die eerste Super 9 byeenkoms van die jaar tussen klubs met 9-putjie bane in die Suid Kaap is Saterdag 17 Februarie op Riversdal gehou. Dit is baie goed deur al die klubs in die omgewing ondersteun en ‘n total van 92 spelers het vir die kompetisie ingeskryf. Spel het al voor 08:00 begin en die laaste hand het net voor 19:00 ingekom. Die dag is gewen deur Stilbaai met 182 punte, gevolg deur Riversdal met 181 en Heidelberg met 177 punte. Individuele wenners van die beterbal kompetisie was Wessel de Bruyn en Johan Swart (Stilbaai) met 47 punte, gevolg deur Piet en Janet Uys (Heidelberg) met 46, en Damian Juta en Charlton Sambo asook Pieter May en Garnet Damons (Riversdal) met 45 punte elk. Groot dank aan JC Slaghuis wat weereens as borg vir die pryse by al die byeenkomste vir hierdie kompetisie deur die jaar gaan optree.

Gholfnuus 15 Februarie

 Die sundowner byeenkoms Vrydag 9 Februarie is gewen deur Basie Nortje met 22 punte, gevolg deur Frans Myburgh, Willie Prins en Reon Grundlingh met 19 punte elk, met Herman Kluyts met 18 punte in die vyfde plek.

Tydens die tweede been van die Race to Wembley houespel kompetisie gehou op Saterdag 10 Februarie het Muller Geldenhuys en Mark Stander hulle posisie op die puntelys versterk deur onderskeidelik derde en vierde te kom. Die dag is gewen deur Frikkie Jackson, wat JC Swart en Geldenhuys op ‘n uittel met 69 houe geklop het, gevolg deur Stander met 70 houe, en Josef Botes en Gawie von Molendorff met 71 houe elk.

Gholfnuus 8 Februarie

Vrydag 2 Februarie se sundowner byeenkoms is gewen deur George Uys met 21 punte, gevolg deur Berto van Dyk met 20 punte, Jaco Swanepoel en Suzanne Olivier met 19 punte elk, en Basie Nortje en Werner van Niekerk met 18 punte.

Tydens die DTM Nissan se jaarlikse borgdag  gehou op Saterdag 3 Februarie het Uys en Swanepoel weereens goeie gholf opgedis, met Swanepoel hierdie keer die wenner wat Uys met ‘n uittel op  39 punte in die tweede plek gedwing het. Hulle is gevolg deur Colin Sharwood en Gawie von Molendorff met 38 punte, en Jannie Goosen, Koos Eksteen en Muller Geldenhuys met 37 punte elk. Groot dank is verskuldig aan die Nissan span van George vir die reelings, aanbieding en pryse van hierdie dag, wat besig is om ‘n gereelde instelling op ons kalender te word.

Gholfnuus 1 Februarie

Die gewilde sundowner kompetisie Vrydag 26 Januarie is oorheers deur twee juniors, met  Alriqye Julies wat met 21 punte gewen het, gevolg deur nog ‘n junior, Keano Hendricks en nog vier ander spelers ook met 19 punte elk: Jaco Swanepoel, Berto van Dyk, Louis Vermaak en Willie Prins.

Saterdag 27 Januarie het die eerste plaaslike rondte van die Windhoek pare byeenkoms plaasgevind wat nasionaal aangebied word. Die uiteindelike wenners van hierdie gewilde toernooi , wat internasionaal gespeel word, sal uiteindelik later vanjaar in Portugal aan die finale rondte deelneem. Die wenners op Riversdal was Gerhard Pienaar en Andre Olivier met ‘n baie goeie 52 punte, en ons wens hulle sterkte toe vir die volgende uitdunrondtes op pad na die finaal. Hulle is gevolg deur Mark Stander en Riaan Kasselman met 51 punte, Anton en JC Swart met 50 punte, en Willie Prins en Walter Diedericks ook met 50 punte.

Gholfnuus 25 Januarie 2018

Tydens Vrydag 19 Januarie se sundowner byeenkoms is die spog-twee balpot, wat tot ‘n aansienlike bedrag opgehoop het nadat dit vir ‘n hele paar weke nie gewen is nie, uiteindelik gewen deur Willie Prins. Berto van Dyk het getoon dat hy met mening terug is deur die kompetisie te wen met 22 punte, gevolg deur Gerhard Pienaar en Jaco Swanepoel met 21, Leon Fourie met 20 en Josef Botes met 19 punte.

Saterdag 20 Januarie se houespel kompetisie is gewen deur Werner van Niekerk met 67 houe, gevolg deur Jannie Goosen met 68 houe, en vier spelers met 69 houe: Koos Eksteen, Josef Botes, Gawie von Molendorff en Leon Fourie. Van Niekerk het met ‘n eindpoging vorendag gekom en afgesluit met arend drie op die laaste putjie om so, na twee rondtes, gelyk te eindig met Mark Stander, verlede week se voorloper om die Le Grange beker. Die twee spelers deel dus die gesogte Le Grange beker in 2018 met ‘n totaal van 137 houe.

Die kalender vir die nuwe jaar is by die klub beskikbaar. Kontak die klub by 0287133056 of 0828520464 vir enige ander navrae of besonderhede oor tariewe en bepalings. Ons nuwe webwerf, www.riversdalgolfclub.co.za, is nou in werking en kan besoek word vir algemene inligting. Besoek ook gerus die facebook blad: Riversdal Gholfklub vir sosiale nuus en plasing van fotos en nuuswaardighede wat op die gholfklub van toepassing is.

Gholfnuus 11 Januarie 2018

Die eerste bepaling van die nuwe jaar was die “Greenkeepers Revenge” wat Saterdag 6 Januarie in baie warm weer deur al 20 spelers baie geniet is. Tydens hierdie geleentheid het die baanopsigter, Makka Swart, probeer om die baan vir die spelers so moeilik moontlik te maak deur ongewone reels en penplasings, maar, ten spyte daarvan, is steeds baie goeie tellings aangeteken.  Gawie von Molendorff wen die houespel kompetisie met ‘n baie goeie 67 houe, gevolg deur Basie Nortje en Peter Petersen met 70 houe, en Frans Myburgh en Garnet Damons met 71 houe.

Ten spyte van die baie warm en droë weer is die baan steeds in ‘n goeie toestand en bedank ons graag vir die baanopsigter en sy personeel wat hard moet werk om die baan so te hou. Ons vertrou dat die reen op sy tyd sal kom en sien uit na ‘n aangename jaar se spel op ‘n puik gholfbaan.

Die kalender vir die nuwe jaar is by die klub beskikbaar. Kontak die klub by 0287133056 of 0828520464 vir enige ander navrae of besonderhede oor tariewe en bepalings. Besoek ook ons webwerf, www.riversdalgolfclub.co.za vir algemene inligting.

Gholfnuus 21 Desember

Die laaste bepaling op die plaaslike 2017 gholfkalender het afgelope Saterdag 16 Desember plaasgevind tydens die jaarlikse “Breakfast Run” wat vanaf 06:00 op die Riversdal gholfbaan plaasgevind het. Dit wil voorkom asof die vroeë afslaan spelers bevoordeel het en uitstekende tellings is in aangename omstandighede aangeteken. Die kompetisie is gewen deur Gaffie van der Merwe met 41 punte, gevolg deur drie ander spelers ook op 41 punte: Werner van Niekerk, Andre la Cock en Colin Sharwood. Twee spelers eindig met 40 punte: Danie Slabbert en Riaan Kasselman, met Grove Koch en Gerhard Pienaar volgende met 39 punte.

Hiermee het die amptelike bepalings vir 2017 tot ‘n einde geloop en wens ons al ons lede en hulle familie ‘n geseënde Kersfees en ‘n baie voorspoedige nuwe jaar toe.

Gholfnuus 14 Desember

Saterdag 9 Desember het die laaste formele kompetisie van die jaar plaasgevind toe die spanne van die kaptein en die president teen mekaar kragte gemeet het. Die span van die president het met die louere weggestap deur met 34,7 teenoor die 33,4 punte van die kapteinspan as wenners aangewys te word. Beste spelers van die dag was Pieter Franklin met ‘n uitstekende 45 punte, gevolg deur die alomteenwoordige George Uys met 40 punte, en drie spelers met 39 punte elk: Frikkie Jackson, Diaan Terblanche en Riaan Kasselman. Leon Fourie eindig met ‘n skaflike 37 punte.

Eerskomende Saterdag 16 Desember vind die jaarlikse “Breakfast Run” plaas met afslaantye net na sonop, gevolg deur ‘n heerlike ontbyt na 9 putjies. Kontak die klub vir nadere besonderhede.

Gholfnuus 7 Desember

Die afgelope naweek is gekenmerk deur drie finale kompetisies voor die aanbreek van die vakansie. Die laaste van die weeklikse sundowner kompetisies Vrydag 1 Desember is gewen deur Keano Hendricks met 21 punte, gevolg deur SP Vermaak ook met 21, Berto van Dyk met 20, en Manie Jardim en Alrique Julies met 19 punte elk. Vermaak is met sy 21 punte ook die sundowner kampioen van die jaar, gevolg deur van Dyk, Nel Mulder en JA (Poen) Vermaak.

Saterdag 2 Desember was die laaste houespel kompetisie van die jaar waartydens die wenner van ‘n TV, geborg deur Wembley Drankwinkel, bepaal is. Die dag se spel is gewen deur Basie Nortje met ‘n baie goeie 65 houe, gevolg deur Riaan Kasselman met 68 houe, Nel Mulder en Muller Geldenhuys met 69 houe elk, en drie spelers met 70 houe elk: Frikkie Jackson, Vernon Appollis en Koos Eksteen.  Met sy konstante spel deur die jaar tydens die houespel kompetisies het Appollis die gesogte TV gewen. Tweede in die kompetisie was Mark Stander, gevolg deur Frans Myburgh. Groot dank is verskuldig aan Werner van Niekerk van Wembley Drankwinkel met sy inisiatief om so ‘n gesogte prys vir hierdie kompetisie aan te bied.

Die finaal van die gesogte John Bowen houespel kompetisie het ook terselfdertyd Saterdag 2 Desember plaasgevind. Vernon Appollis en Marco Olivier het na ‘n reeks uitdunrondtes na die finale rondte deurgedring waar Appollis as wenner uit die stryd getree het. 

Eerskomende naweek 8 en 9 Desember vind die Kaptein vs President kompetisie plaas waartydens die twee spanne teen mekaar sal meeding in ‘n kompetisie soortgelyk aan die van die Ryder Cup. Vrydag 8 Desember sal die spanne oor 9 putjies kompeteer, terwyl Saterdag 9 Desember oor 36 putjies gekompeteer sal word. Spanne sal Donderdag 7 Desember tydens ‘n funksie by die klub bekend gemaak word. Kontak die klub vir verdere besonderhede.